投資二三事

我的投資經驗不多，投資亦不算有道。雖然有時表現得好無知咁問人攞料，有時更會扮羊太叫人俾啲number我去借孖展炒股。但其實，本人尚算係一個理智既投資者。我唔會借孖展去炒既，呢啲真係講下笑就好，皆因自己既錢唔多，而且都明白股票呢啲嘢分明有莊，要跟大莊家玩有時真係浸死都唔知咩事啊。

不過在投資，同埋跟人講投資既時候識到唔少嘢，都算係成長一部分，不妨喺度同大家分享下：

1. 投其所好，打破隔閡
以前，當你細個好不屑銅臭既時候，阿爸阿媽啲投資血淚史一定唔會同你分享，你問極屋企財政狀況大家即時扮聾，問親係唔係股票唔掂佢地會面有難色然後唔答你。但係，當你都投埋一分既時候，又識得講到一兩個number，佢地開始打開心扉同你講下買咩好呢，我又蝕左幾多，個銀行又難抽IPO真係阻住發達等等等等。原來，投資都可以係一個好好既話題，增進親子感情呢。

2. 小心至上，最後蝕錢
有個阿姨係完全保守派既投資者，又想賺錢又唔肯要風險，次次IPO好小心咁抽一手，明知好難中籤都係隻隻抽，手續費都蝕埋。雖然有啲嘢唔係話會穩賺，但既然自己係睇好既，點解唔擺多少少落去試，其他唔想要既就直情唔好試。做人都係，有啲人/事係想爭取既就應該放多少少時間心機。樣樣少少，最後可能一無所有。

3. cash is king
本人雖然話理智，但投資起嚟有時都可以幾狼，10次想入市8次都係俾阿媽阻止。佢嗰一句cash is king真係吹到我bear一聲，本人既網上理財係由阿媽主理，可以話係完全被動。但永遠就係要有個婆婆媽媽既人喺你隔離阻止住你，你先唔會一舖過輸晒啲身家。

4.太多分析 = 咩都做唔成
Warren Buffet有佢既投資法則，簡單明確，同依家一般俾90幾個方法你去用既Analyst好唔同。咁都係既，人地上晒岸真係扮嘢醒啲貼士你都得，Analyst為左要證明其存在價值，點都要拋少少50天平均線同陰陽燭嚟大一大你。人地分析係好，不過我地呢啲冇真係學過既，都真係唔知點睇好。講到尾你又咪係睇下佢條線係唔係升勢？有時啲嘢，信自己眼光，咁當然都要有少少理據俾番自己啦。睇下公司management好唔好，deal開既係咩公司，然後諗下個前景，睇下佢legal用咩人，啲director得唔得，有冇咩戰績，可能就係你要知既嘢。當然咁講都有啲過分簡化咗，但想講既係喺平日生活中真係見到好多思前想後最後一事無成既人，我公司尤其多。總之有時機關算盡都係錯，set個time frame俾自己，做就做，仲要係幾時之前做，唔做就算。