一套戲

新年假期時睇咗一套戲。男主角本來有個好好既女朋友，唔單止支持佢搞生意出書，仲按咗自己層樓俾佢去發展事業。男主角事業有成，但中途見色心起搭上咗一個舞小姐，舞小姐生性刁蠻，自己霸到既嘢當然唔會咁容易俾佢走。佢走去搵男主角既女朋友講數，兩個人坐喺梳化一頭一尾，冷戰咗好耐。最後女朋友決定離開，俾個第三者做女主人。

男主角返到屋企好驚訝，起初只係諗住玩下，冇諗過女朋友都會冇埋。其實，男主角一早已經將按樓既錢俾番女朋友，但佢最後竟然發現張支票冇俾人拎走，上面仲寫住 I love you。

男主角見到張支票忍唔住喊，但最後都冇追番呢個女仔，就係因為自己覺得好內疚，就算搵番佢都冇面目再一齊。

故事的反思就係，究竟喺愛情方面，做好人係唔係一定會有好報呢？做衰人又係唔係真係有日會粉身碎骨兼永不超生呢？唔知。不過內疚真係可以令一段關係完全番唔到轉頭，男人要做衰人其實不如由佢做，拎番佢張支票，打劫埋佢屋企，唱衰佢再淋佢紅油，可能，可能，個男人就會返回你身邊。因為佢覺得，我衰，你仲衰過我，咁我同你一齊就匹配嘞。

好可憐？其實我以上講既嘢都同愛情無關，真係愛一個人既話一定會做女朋友做既事，但有愛情又唔代表可以維繫兩個人既關係，究竟要做衰人定係要做好人，大家自己揀。