萬千師奶賀台慶

睇咗詹瑞文同林奕華既《萬千師奶賀台慶》。整體嚟講我覺得係一部幾創新，但又幾唔創新，幾有view但又幾冇view既舞台劇；佢唔創新係因為佢有好多位都係抄足無線，例如係不停重覆既溏心風暴主題曲同對白，仲有無限個根據無線劇集整出嚟既笑位，可以話係，冇咗無線既劇佢就冇咁多笑料；但佢創新就在於佢探討香港最大既電視機構既思維方法，同埋香港人受電視劇影響既意識型態，我估之前未有劇集真係用呢個手法去探討。而套劇有view在於佢不停話俾大家知道TVB劇好悶好白痴好低能，唔肯革新，又唔肯進步，但佢又冇同大家講究竟電視台應該有個咩角色，觀眾應該點睇 一個劇集，TVB又應該係點求進。總而言之，諷刺成分有餘，不過搞笑同說服力都不足。

之前睇過一個Ed Lam既專訪，佢講到TVB一文不值，40年冇進步過，記者最後一句問佢，咁你係唔係覺得TVB一無是處？Ed Lam話佢覺得TVB真係一無是處。喺呢度我又抱個唔同既態度，我都會認為TVB有好多劇作係好重覆，例如係皇庭，妙手仁心，紀律部隊不停番兜又番，自己都會覺得有啲fed up，但又唔會覺得TVB真係一無是處。其實TVB既故事就正正係因為老套而真係做到一個輕鬆娛樂既效果。例如講，外國既Nip Tuck係真係既奇情又迫真，但係我個人嚟講唔會想放咗工都睇啲咁heavy既題材，而且就係世界變得咁快有時睇下啲老套野先開心。
我相信問題所在就喺呢度，究竟我地要求既電視劇係點？係要輕鬆唔用腦？定係要反思有深度？有咩觀眾就有咩節目，TVB係咁唔可以全都歸究佢地內部，而係香港人急速進化既社會生活節奏，同仲埋我地中國人式既守舊思想之爭。我地想睇既可能真係唔係一啲好avant garde既嘢，只係覺得，有啲嘢keep番舊時既都唔係壞。另一方面，TVB既劇雖然低能到搞笑，而且忠奸分明，又唔會討論一啲好敏感既時事題材，雖然咁樣未必係會為我地帶來一個進步社會，但起碼收到和諧之效。好似話little britain既，佢地講好多同性戀既題材，有啲人講得佢地做得好，因為有個social inclusion，但其實反對既聲音都好多，因為有人都覺得佢地貶低佢地，咁究竟create一個討論係為個劇做勢呀，定係真係想引起關注呢？

TVB都唔算係一無是處既 ─ 劇集白痴，佢有一啲資訊性節目搭救，例如係星期二檔案。再講，喺好多時TVB既劇都通常係導人向正面既方面諗，我地都唔可以抹煞佢地對社會既正面作用。

當然，講到尾都要睇下大家都電視有咩要求，而我地都要問點解，喺今時今日我地既觀眾有咁多電視以外有咁多娛樂都要睇TVB，佢帶俾人既，又係唔係一套劇集咁簡單呢？