假如你是華dee......

這天，我有個奇遇。做gym的時候竟被一個星級教練搭訕，游說我聘請他為我的私人健身教練。

這下我可真呆了 ─ 不因為他是星級萬人迷，也不因為他靚仔，而是因為，我的會籍都快完了，你怎麼忽然留意到我的存在，又怎麼現在才游說我上personal training呢？第一個反應是因為金融海嘯，他要密密撲水，海嘯撲向他，他撲向我，就是如此簡單的邏輯。

我知他等了我很久，等我做完gym沖完涼他才扮碰見我的走出來，那我姑且跟他聊幾句。我其實不打算請什麼trainer更不會再續會籍，不過我多口問句：「呀，其實你收幾錢一堂？」星級萬人迷非常情深的答 ：「 一千蚊。」

我即時變臉。「唔係呀嘛人地隔離間gym好貴嗰個都係收600蚊一堂咋。」

星級萬人迷咀角露出微笑，刻意壓低聲線說：「OK，如果你請我做私人教練我收你600蚊一堂。」

騙局！如果我不知市價，可能開800元我都已經覺得好抵了。

「星級萬人迷，海嘯呀依家，我邊有咁多錢，你收到咁貴。」

「唔可以咁講，有好多人唔知自己要點修身，我地就知，知道用咩方法，最快減到收效。」

「咁你啲學生有咩成績？」

這時星級萬人迷非常引以為傲咁話：「我有個學生兩個月減左6 kg，我覺得佢瘦得太快啦......不如你試做個脂肪比例test喇。」

「我唔想知我個脂肪比例係點喎。」我開始扮difficult。

「點解呀？知下都好啦。」星級萬人迷用其溫柔的聲線以及華dee般的眼神望住我，雙眼動也不動，目不轉睛。

我也盯實他說：「我真係唔想知。」

「今日唔想知，下次啦咁。你下次幾時嚟呀？」星級萬人迷的聲音開始有點搞笑，唔識的以為我狠心拋下他，他就要情深我問我幾時再來。

「星期一啦！」

「咁係啦喎，你俾你電話我喇。」

「吓？」

「電話都唔敢俾我呀你？」星級萬人迷在大我呢！

大家可以猜我最終有沒有把電話號碼給他，其實對話中間有很多地方已經被刪掉，整個conversation足足有15分鐘。但重點一提的是當一個人想sell客的時候真的會無所不用其極，將其最有自信的一面不停表露。這個教練其實為人不錯，教學也認真，但一到這些時候就忽然當左自己係華dee，希望把你電暈之後就可以每個月你出糧俾佢。

但，我自己都不知自己的前途如何，貿貿然給你600蚊一堂來看你那華dee般的眼神又真的有點冒險了。

最重要的是，雖然我都真的好喜歡華dee，但我知，華dee其實只是得一個啊！