電影週

電影週小結：

《CIA 光碟離奇失竊案》(Burn after reading)─ 拍案叫絕。雖然由始至终都沒有一個驚天大陰謀，但鋪排特別，手法乾淨，非常好睇。再加上粒粒巨星，唔鍾意個劇情都要留意演技。

《窒色》(Choke)─ 都算驚喜。以為是另類的桃色謀殺案，原來講性癮成癖的主角如何找出其有病的因由。但劇情有點拖泥帶水，愈睇愈悶囉。

《家有喜事2009》─ 一定冇1991咁好睇架啦，不過由於係完全冇期待既心情去睇，我竟然都仲笑得出，連我最頂唔順既鄭中基都引到我笑喎，冇浪費時間既感覺。

《大開眼戒》(Eyes Wide Shut)─ 呢套就真係浪費時間嘞。我都唔明點解我係都要租番呢套嚟睇。可能係因為俾Stanley Kubrick呢個名呃咗啩。

《赤壁2》(認真睇)─ 其實睇完一次三國史再睇呢套戲覺得仲有味道，亦知道故事邊度係真，邊度係假。其實呢套戲，不論人物演技都係一般，冇人特別impressive又冇人特別壞大事，但大堆頭之下又覺得套戲好值回票價，講到底都係個歷史故事本身吸引。

《二百萬奪命奇案》(No country for old men)─ 其實未睇哂。係因為睇完《Burn after reading》先至再繼續睇高安兄弟拍既戲。但個男主角Javier Bardem個樣真係變態到有點disturbing，睇到一半見佢係咁殺人已經想熄機！不過呢套戲真係好緊張，我上網睇人講既影評，完全同我既感受同出一徹 ─ 就係透唔到氣咁驚，唯一唔同既係，網友覺得Javier Bardem似羅浩楷，我覺得佢似詹瑞文......(註：你真係諗唔到，佢，竟然係同Penelope Cruz拍緊拖囉，我幾時都叫你唔好以貌取人架啦！)

不日上映 ─ 《證人》，《C+偵探》，《保持通話》，《雪花高離奇命案》，《大保齡離奇綁架》......仲有好多好多......